Part 1 – Dosti Jo Har Plan Ko Barbaad Kar Deti Hai
Welcome to my story blog!
This is Part -1 of an original comedy series titled
3 Tigada, Kaam Bigaada
Ye story hai teen doston ki —
Gurpreet (Punjabi), Sameer (Muslim), aur Raghav (Hindu) —
jo alag backgrounds se hote hue bhi ek strong friendship share karte hain.
Inki life ka simple rule hai:
“Jahan ye teen saath hote hain… wahan kaam bigadta zaroor hai.”
Part 1 – Dosti Jo Har Plan Ko Barbaad Kar Deti Hai
Mumbai ke ek simple se area mein ek chhota sa garden tha. Garden ke bahar ek famous jagah thi — Pandey Chai Stall.
Yahan chai se zyada famous the teen ladke.
Log unhe dekhte hi samajh jaate the ki ab kuch na kuch ulta hone wala hai.
Area ke log unhe ek hi naam se bulate the:
“3 Tigada.”
Aur reason simple tha.
Jab bhi ye teen saath hote…
kaam almost pakka bigadta tha.
Teen Doston Ka Introduction
Sabse pehla banda tha Gurpreet Singh.
Punjabi banda. Height bhi zyada, awaaz bhi zyada, aur confidence toh itna zyada ki kabhi kabhi lagta tha duniya ka PM bhi usse advice le.
Uska favourite dialogue tha:
“Oye tension kyun lete ho? Ho jayega!”
Chahe situation kitni bhi kharab ho.
Dusra tha Sameer Khan.
Ye banda thoda smart type tha. Matlab khud ko toh bahut intelligent samajhta tha.
Uski aadat thi har baat pe sarcastic comment karna.
Agar Gurpreet idea deta, Sameer turant bolta:
“Bhai idea acha hai… bas ek problem hai.”
“Idea bilkul bekaar hai.”
Teesra tha Raghav Sharma.
Ye teeno mein sabse normal banda tha.
Responsible bhi tha… thoda emotional bhi.
Lekin problem ye thi ki uski dosti galat logon se ho gayi thi.
Uska favourite dialogue tha:
“Ek din tum dono ki wajah se main jail jaunga.”
Roz Ka Routine
Har shaam teenon ka fixed routine tha.
Garden ki ek purani si bench par baithna.
Pandey ji ki chai peena.
Aur life ke bade bade plans banana.
Ek shaam Gurpreet suddenly khada ho gaya.
Dono haath hawa mein utha ke bola,
“Bhaiyo… ek important announcement hai.”
Sameer ne bina upar dekhe bola,
“Drama band kar aur bol.”
Gurpreet ne serious face banaya.
“Hum log apni life barbaad kar rahe hain.”
Raghav hairaan ho gaya.
“Kyun?”
Gurpreet bola,
“Hum itne talented log hain… phir bhi kuch bada nahi kar rahe.”
Sameer ne chai sip ki.
“Haan talent toh hai.”
Thoda ruk ke bola,
“Galat kaam karne ka talent.”
Pandey ji stall ke peeche se hans pade.
The Great Business Idea
Gurpreet suddenly excited ho gaya.
“Bhaiyo ek idea hai.”
Sameer:
“Phir se?”
Gurpreet:
“Hum business start karte hain!”
Raghav ko idea acha laga.
“Kaunsa business?”
Gurpreet proudly bola,
“Food delivery business.”
Sameer ne eyebrow uthaaya.
“Delivery tu karega?”
Gurpreet:
“Haan.”
Sameer:
“Matlab aadha khana raste mein tu khud kha jayega.”
Raghav ne serious tone mein bola,
“Business ka naam kya hoga?”
Aur phir shuru hua naam ka maha debate.
20 minute tak ideas aaye:
“Food Express”
“Khana King”
“Fast Tiffin Service”
Phir Sameer ne bola,
“Naam simple hona chahiye.”
“Bhookha Mat Mar.”
Gurpreet turant excited.
“Oye kya naam hai!”
Raghav thoda doubtful tha.
“Thoda negative nahi hai?”
Sameer bola,
“Honest marketing hai.”
Banner Ka Tamasha
Agli subah teenon ne ek bada sa banner print karaya.
Us par likha tha:
BHOOKHA MAT MAR PVT. LTD.
Fast Food Delivery
Banner lagate waqt teenon bahut proud feel kar rahe the.
Tabhi ek aadmi wahan se guzra.
Usne banner padha.
Phir teenon ko dekha.
Phir bola,
“Naam dekh ke hi bhookh mar gayi.”
Aur chala gaya.
Sameer ne Gurpreet ko dekha.
“First customer gaya.”
Gurpreet confident hi raha.
“Oye marketing mein time lagta hai.”
Sabse Bada Shock
Teen ghante beet gaye.
Ek bhi order nahi aaya.
Tabhi Gurpreet bola,
“Yaar mujhe bhookh lag rahi hai.”
Sameer:
“Toh?”
Gurpreet ne phone nikala aur bola,
“Main food order kar raha hoon.”
Sameer shocked.
“Kahan se?”
Gurpreet:
“Dusre delivery app se.”
Sameer ne face pakad liya.
“Tu apna business chala raha hai ya dusre ka?”
Gurpreet calmly bola,
“Customer experience check kar raha hoon.”
Bike Promotion Plan
Shaam ko Sameer ne bola,
“Promotion karna padega.”
Unhone ek cardboard board banaya.
Us par likha:
“Bhookha Mat Mar – Fast Delivery.”
Board ko Raghav ki bike par baandh diya.
Teenon proudly area mein ghoomne lage.
10 minute baad bike ruk gayi.
Raghav bola,
“Petrol khatam.”
Sameer ne aankhein band kar li.
“Perfect.”
Gurpreet bola,
“Koi problem nahi.”
“Push karte hain.”
The Disaster Moment
Teenon bike push karne lage.
Problem ye thi ki road downhill tha.
Bike achanak fast ho gayi.
Raghav chillaya,
“Brake lagao!”
Sameer bola,
“Main push kar raha hoon brake kaise lagaun!”
Gurpreet chillaya,
“OYE SIDE HATO!”
Bike seedha jaake ek police jeep se takra gayi.
Teenon freeze.
Jeep ka door khula.
Ek police officer bahar aaya.
Usne teenon ko dekha.
Phir board padha.
Phir bola,
“Yeh kya ho raha hai?”
Sameer ne seedha jawab diya,
“Sir… business promotion.”
Police officer ne deep sigh li.
Raat Ka Realization
Raat ko teenon phir Pandey chai stall par baithe the.
Banner aadha phat chuka tha.
Business officially band ho chuka tha.
Raghav ne thandi saans li.
“Humse kuch nahi hone wala.”
Sameer bola,
“Startup ka lifespan — 1 day.”
Gurpreet fir bhi muskura raha tha.
Pandey ji chai lekar aaye aur bole,
“Beta ek baat bolun?”
Teenon ne dekha.
Pandey ji bole,
“Alag alag rahoge toh shayad kuch kar loge.”
“Par saath rahoge toh…”
Sameer ne sentence complete kiya.
“3 tigada… kaam bigaada.”
Teenon zor se hans pade.
Kyuki sach toh yehi tha.
Unke plans fail ho sakte the.
Unke ideas stupid ho sakte the.
Lekin unki dosti solid thi.
Aur unfortunately duniya ke liye…
yeh sirf shuruaat thi.
Aage to inki life aur tufan aane wala hai....
Comments
Post a Comment